The Secrets … الاسرار

 

السر

بالاول حابة  قول شكرا لـ ريم ووريقات حلم لتمريرهم هالواجب التدويني لالي

تانيا انا اسفة ع تأخير حل الواجب لهلا .. طبعا السفر وعجقة الاحتفالات الي كفتت عليي هي السبب

والواجب كالتالي :

“ أن تذكر ستة أسرار لا يعلمها الآخرين عنك ، و أن تقوم فيما بعد بتمرير الواجب إلى ستة مدونين آخرين “.

هلا مرر الواجب لستة غيري سهلة بس اذكر ست اسرار مابيعرفها حدا عني هي كانت صعبة شوي لانو مافي شي محدا بيعرفو عني بس ححاول

 

1- 15/6/1986 ولا 23/9/1986 ؟؟

هدا تاريخ ميلادي .. طبعا انا مولودة بالرياض واول شي بيعملو للانسان بس ينولد بينكتب تاريخ ميلادو وانا عملو هيك معي بس المشكلة انو كتبو التاريخ مو صح .. وجتى جواز سفري مسجل فيو تاريخ ميلادي غلط .. وطبعا سألت وبحبشت وبالاخر ضل معي هاليومين

ومنشان التوازن بحياتي سجلت بالهوية والجواز التاريخ الاول 15/6 بس بحتفل ب

23/9 ووقت بفكر اسمع ابراج بسمع كمان برجين الميزان والجوزاء وبنقي الاروء وبمشي عليه بيومي … ممكن يكون للانسان ابين وامين وعيلتين .. ومعي صار ممكن يكون الو تاريخين ميلاد 🙂

 

2- متفــــائــــلـــة :

عندي تفاؤل بيتوزع ع قارة افريقيا كلها ودائما بنسأل منين بجيب هالتفاؤل .. بس للأمانة ولا مرة عرفت منين بجيب هالتفاؤل

 

 

3- ردات فعل عكسية :

بتزكر مرة خبروني انو رسبت بمادة ضليت طول النهار عم  اضحك … وممكن كون بعرس وضل كانة وهادية  ..

4 – غراب وبوم وضفدع :

من الشغلات الي نادرا ماقولها انو انا بحب البوم والغراب والضفدع … على الرغم من انو كتير ناس ببتشائم منهم بس انا كتير بحبهم ..

البوم بحسو طائر حكيم .. مقضي لمصدي فايت كتير فوتات لحتى قدر يطلع بهالعيون الراضية والوش الهادي

اما الغراب فبحسو مشاغب وبصلتو دائما محروقة .. ومابيقدر يقعد بمكان وبيحب يحركش هون وهون .. فيو شي مني

الضفدع بحب ملمسو .. بحسو مغلوب ع أمرو وادني بتحب نقيقو بحسو موسيقى غير منظمة

5 – فضول ونــــــــــــــــــق :

الفضول غصب عني موجود شئت ام ابيت انا فضولية حتى مع محاولات الكنترول ع هالصفة بس غصب عني بتطلع وبثبت بالنهاية انو انا فضولية كتير كتير بس الاضرب من الفضول النق … لنتخيل انو صابتني نوبة فضول وماعرفت الي عم اسال عنو دغري بستخدم سلاح النق المحرم دوليا … وبشتغل ع نق نق نق نق

بس الحق والحق يقال سلاح فعال جدا جدا

6 – الغيــــرة :

بكل أشكالها .. غيرة عــلــى او غيرة مــــن

مابنكر انو هالصفة بتدفش لقدام .. بس كمان بتكورني ع حالي احيانا وبتجمدني بمكاني

الغيرة أحد الاسباب الرئيسية للنحف

بما انو مافي شرطي مدونات حيجي يحاسبني فححط سر سابع عني عالبيعة 🙂

7 – بآمن بالرسائل القدرية :

جدا وجدا

كل شي حولينا لو عرفنا نقراه صح بنقدر نكتشف مستقبلنا شو مخبيلنا … الشرط نعرف نتواصل مع الي حولينا ومابقصد البشر بس كل شي حتى الحجر والشجر والغيم ..الخ

طبعا انا بحب اتجسس ع الاسرار لهيك حمرر الواجب لــ

Mosaic – فراسو

 إيكار – رياح التغيير (أنس)

فتوشة

طبشورة

الحياة وشياطين أخرى – كنان

شعاع أمل محترق

وليد شام

Advertisements

26 thoughts on “The Secrets … الاسرار

  1. صباح الخير للجميع وأولهم صاحبة التدوينة الفضولية …….

    مابعرف شو القصه ولا شو الموضوع بس موضوع الأسرار على وجه العموم والأسرار المكتوبة فوق على وجه الخصوص أثارت فيني شغلات خلتني اضطر اكتب ولذلك أرجو تقبل مروري ولكم مني كل الشكر ….. ماعلينا كلها كانت مقدمة ,,,

    أكاد أقسم بأنني أرسلت رسالة نصيه بتاريخ 22\9 فيها مباركة عيد الميلاد, لكن تقرير وصول الرسالة كان له رأي آخر ….. يالها من تكنولوجيا غبية !!!

    بتاريخ 128\2007 بعث لي أحدهم رسالة خاصه في أحد المنتديات(كان اسمه …..) وكانت فحوى الرسالة كالتالي:
    هذا أنت ….
    ماأن أقرأ حتى تعود تلك الذكريات بزخم الى ذاكرتي

    وأنأى بنفسي عنها وكأنها لا تعنيني
    لكنني أجذب من ياقتي لأجدها تصرخ في أذني هذه أنتِ وذاك هو

    ربما كنت تكذب لكنني لم أكن صادقة كما كنت يومها

    …………..

    هادا انت (يا…….) مابتختلف يمكن لو بيمر ع راسك مليون سنة

    يؤسفني جداً بأن ذكائي حتى تاريخ اليوم لم يستطع أن يفك طلاسم كلمة واحدة من ماكتب …. نقطة سوداء بحقي لكنني مضطر أن أتقبلها.

    هي مجرد محطات يجب العبور بها طالما كانت لدينا نقطة وصول, لايمكن قانونياً أن نصل دون العبور بها إلا إذا كنا نملك قدرات رجل سيدنا سليمان الذي أحضر له عرش بلقيس قبل أن يرتد إليه طرف.

    ليس لدي الكثير اليوم لكنها أمنية طالما تمنيتها وعندي يقين تام بأنها لن تتحقق, ياريت إسمع هالشخص اللي ببالي بيحكي إنكليزي قدامي :)))

    شكراً جزيلاً ولكم مني عبق الورود ….

    لك أنتِ كل الرقة والود …. كم أعشق حروفك

    1. اهلا بك وبكل الرقة والود … وشكرا على المعايدة التي لم تصل
      يكفي ان تذكر التاريخ وامنية في القلب وكن واثقا بـأنها ستصل حتى لو لم تخبرني بها
      .. بالنسبة للامنية استوقع انها لن تتحقق

      تحية لك

  2. هلق كلهن بعرفهن مو مشكله بس قصة عيد ميلادك حلوه !!!! الغريب انه فرق كبير بالاشهر من 6 لشهر 9 !!!!! ماما عندها فرق بس هو عباره عن شهر ونص فقط لاغير شفتي مو كتير ما ما !!!؟؟؟؟

    1. تخيلي هالفرق ؟؟؟
      يلا مو مشكلة هالفرق ظريف مشان وقت مل بنص السنة اعمل عيد ميلاد واخد هدايا
      واذا مليت اخر السنة اعمل عيد ميلاد وكمان اخد هدايا 🙂

  3. وصلت الدعوة بس لا تحولي حتى حوّل أنا بالأول لأني بالأردن وما بعرف أكتب خارج حدود الساحل من المحيط الى مرفأ طرطوس

    كشفتي حالك بحالك وهلاكك ح يكون قريب شغلة ستين سنة انشالله

    1. هلا كنان بما انو انكشف عنك دخيل عينك شفلي امتى حأتوظف بس وامتى حأتجوز بما انو صايرة وصايرة … بس كلو وتقلي بيظي الفال لانو هاه ناشفة

      انت من بين الكل مو مصدقة اكتى اقرا اسرارك لانو بعرف كمية الدسم الي حتطلع معنا

  4. يعني هلأ أنت بالهوية أكبر من أنتي بشي 3 أشهر ..
    أيوووووووووووووا

    يعني هلأ بما انو يلي أكبر منك بيوم أعلم منك بسنة وبما أنو أنت أكير من حالك بـ 100 يوم يعني أنتي أعلم من حالك بـ 100 سنة .. والله هي حكمة وخبرة مو قليلة!!

    في تحشيش بالموضوع !!

    اشاركك الرأي بخصوص الرسائل القدرية .. ما من شيء يحدث إلا وله مغزى .. حتى الأشياء الصغيرة .. نحتاج كثيراً لأن نلتقط رسائل الله .. لنفهمها ونفهم سبب حدوثها أو حتى المؤشرات المستقبلية التي تدل عليها …

    شكراً للتمرير دعدوشة ..أقصد توت (محبب لي أكثر 😉 )
    أعتقد أنني فضحت نفسي فيما فيه الكفاية عندما مرر لي هذا الوسم سابقاً .. حاجة كفاها الله!

    http://fatoshaa.wordpress.com/2008/06/27/%d9%81%d8%b6%d9%8a%d8%ad%d8%a9-%d8%a8%d8%ac%d9%84%d8%a7%d8%ac%d9%84/

    1. اي انا اكبر من حالي بمية يوم ووقت بدي صير منفصمة مزبوط دعدوشة المولودة بنص السنة بتخانق دعدوشة المولودة بأخر السنة … ياما ملتمين العيلة ع صواتهم بس الحمد لله لهلا ماتطلقو
      والا كنت رحت انا بين الرجلين 🙂

      اما بالنسبة للرسائل القدرية فالحياة عبارة عن لوحة كبيرة متداخلة لاتنفصل كل تفاصيلها عن الاخرى
      احيانا علينا ان ننظر اليها بكلية والاخرى بكثير من قراءة للتفاصيل لنفهمها

      قبلة لهذا المرور :*

  5. يعني يادعدوشة انا صارلي فترة طويلة غايبة عن التدوين
    فتحتو بالصدفة وحبيت طل على مدونتك الي صارلي مدة غايبة عنها
    واذ ارى هذه التدوينة حبيت الفكرة وبديت اقرأ وطبعا ماخطر ببالي ولا 1% انو كون ضمن القائمة عندك ولا تخيلت انو ممكن تكوني متذكرتيني

    فانا حاليا اكلت هم شو افضح عن حالي وتانيا سعيدة جدا بإني لازلت على بالك 🙂

    1. اصلا هالتمرير كلو عملتو كرمال تصحصحي بعد كنة الامتحانات الي يارب تكوني خلصتي منها ع خير بعدين مين قلك انو اذا غبتي عن العين فأنت مو بالقلب

      اشتقت لهالطلة … 🙂

  6. لم أجد مرادفا ً لتلك الصفات إلا في قواميس الطفولة العفوية
    المشبعة بحس الطفولة الحقيقي ..

    ود

    1. متل ماقلت لناسداك انو نحنا دفعة التمانينات بيكون النا بصمة خاصة
      ومميزة … حبيبتي ديما
      اهلا فيك كل يوم

  7. قصة تاريخ ميلادك عن جد غريبة لانو الفرق بين الصيف و الخريف مو بين كم يوم
    بس هي القصة مو اغرب من الغراب و البوم و الضفدع .. بحييكي على التضامن مع هالكائنات اللي مابعتقد انها لقت مين يتضامن معها من قبل ..

    اسرار ظريفة
    كنت سعيدة بمعرفتها

    و عشرة من عشرة

    1. هاااااااااي واخيرا عشرة من عشرة
      من ماقبل الجامعة ماعاد اخدت العلامة الكاملة

      والله ياريم قصة الميلاد خطأ من المشفى لانو مااهتم يكتب التاريخ صح
      ومحدا قدر يفيدني فيه بعدين لانو الكل بيصفن وبيتحزر
      حتى ماما بتتزكر كل تفاصيل هدا اليوم ماعدا التاريخ …
      كل شي منبوذ بالحياة الا مايطلعلو مجانين يتضمانو معهم 🙂

      تحية لك

  8. ابعتيلي شوية تفاؤل طالما مطفطف وطايف عندك كومايات كومايات وعم توزعيه على أفريقيا .
    وعلى اعتبار الفضول طبع مشترك بين الأغلبية ذكوراً إناثاً .. فأكيد الكل استمتع
    متلي بهالتجسس ..
    تم الاستلام ، بشو بدنا نفضح حالنا هلأ ؟!

    1. انا اصلا مشان هيك وزعتو ع افريقيا ..
      لأنو بعرف تبعوت اسيا بتديق عينهم بسرعة والكل بصير بدو يتدين 🙂

      والله كل ماكانت الاسرار تقيلة اكتر كل ماكانت الفضيحة بجلاجل اكتر

      وردة للمبتسم

  9. عندي رفيقة بتحب الغراب وبتذكرها بس شوفو بقول سبحان الله اللي بعتلك حدا يحبك , هلئ صاروا تنتين , بس انو الضفدع وملمسو 😦

    أسرارك مهضومة وبتعكس شخصية مرحة ومستمتعة بالحياة ….

    صباح الخير

  10. يا الله رقم خمسة كانك عم تحكي عني انا نقاقة وفضولية كتير .. حبيت هالتدوينه كتير ويسعد مساكي ومسا الجميع ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s